«ChuRivages» – las rivas dal «lai da Cuira»

La SPF ha elavurà in concept per la «Cuntrada da lai Cuira»

(anr/grc) La partiziun architectura da cuntrada da la Scola polivalenta federala da Turitg (SPF) ha elavurà in project sco che la cuntrada «optimala» da lai sin il Rossboden da Cuira pudess vesair or. La suprastanza da l'«Uniun cuntrada dals lais Cuira» (CSV), Churer Seeverein, sut il presidi dad Anna Ratti en collavuraziun cun la SPF han ier preschentà quest project als meds da massa a Cuira.
L'idea da construir in lai sin il Rossboden da Cuira nun es nova. Ils 21 d'october 2004 èn insaquantas persunas sa radunadas cun l'idea da rabagliar «l'idea lai» in pau pli manaivel a la realitad. Tant differentas che las motivaziuns eran, la visiun è stada: «Cuira dovra in lai, il Rain duai vegnir pli manaivel a Cuira.»
Dal studi da realisabladad dals 2007 ha resultà che ina regiun da lai Cuira fiss realisabla era resguardond las pretensiuns davart da la protecziun da las auas e da la protecziun da las inundaziuns. Sin fundament da pliras variantas da concept è vegnì elavurà il concept grop «ChuRivages» che pudess era vegnir realisà en etappas.
Ina gruppa da lavur cun students sut Christophe Girot, professer per architectura da cuntrada a la SPF a Turitg e docenta Martina Voser, ch'è creschida si a Cuira, è vegnì elavurà ina proposta cun il num ChuRivages. Quest concept da cuntrada duaja furmar il fundament per las proximas debattas davart il futur da quest areal che vegn oz anc utilisà dal militar. «Il poxim act vegn ad esser in politic cun tut ils pertutgads da la confederaziun enfin il vischinadi da Favugn», ha docenta Martina Voser manegià. L'areal da nova restructuraziun Rossboden sco regiun da recreaziun vischina cun purschidas per far sport e per il temp liber, amplifitgà cun rivas da far bogn ed ulteriurs territoris sut protecziun da la natira sco er novs quartiers da citad per abitar e zonas per mastergn, tut quai cuntegna il project ChuRivages.

Rain strusch pli vesibel

L'idea directiva dal concept saja il potenzial dal Rain che saja oz strusch pli vesaivel. Cun agid da duas mesiras duaja quest flum puspè survegnir sia muntada. Ina revalitaziun posiziunescha il Rain pli manaivel a la citad e dat a quest flum in letg pli lad. A la riva nova dal Rain duaja vegnir creà in attractiv quartier per abitar e per mastergn e la riva duaja obtegnair ina promenada. A la regiun da recreaziun vischina duaja en il medem mument ina segunda mesira dar la tempra – numnadamain è quai in lai artifizial circa uschè grond sco il lai Tavau. Differentas zonas da riva possibiliteschan diversas utilisaziuns per sport d'aua ed activitads per passatemp sco per exempel nudar u remblar. Inslas umidas e reservats en adattads per plazzas da gnieu per utschels e sco refugi per autras spezias d'animals, dentant che la riva dal lai sco tala porscha novas perspectivas per in turissem en accord cun la natira.

Resguardà differents interess

Tut en tut resguardia quest concept ils pli differents interess e porschia variantas d'utilisaziun multifaras. A la scola SPF saja i reussì da resguardar ils interess dals planisaders da citads enfin quels dals protecturs da la natira. «A la citad da Cuira vegn purschida la pussaivladad unica d'augmentar l'attractivitad da la citad cun 'energia visiunara e resolutadad' entant che possia vegnir purschida als abitants ed als giasts da vacanzas ina retscha da novas activitads e pussaivladads», ha ditg Christophe Girot. A la dumonda cura che quest project pudess esser realisà ha Anna Ratti respundì: «En ventg onns», dentant Martina Voser ha manegia: «Avant, avant.»
L'Uniun cuntrada dals lais Cuira (CSV) è vegnida fundada ils 21 d'october 2004 cun la finamira da realisar en il conturn da Cuira in lai artifizial e spazis vitals sco regiuns da recreaziun vischina ed implants per passatemp e sport per la populaziun da Cuira e lur giasts. L'Uniun cuntrada dals lais Cuira è politicamain e confessiunalmain independenta.